Archive for the ‘Love Poetry’ Category:
Dunya To Hai Eik Sayraab Is Ke Siwa Kuch Nahi
Zindagi Main Hai Dhoka Is Ke Siwa Kuch Nahi
Tamashaei Hai Yeh Dunya Is Ke Siwa Kuch Nahi
Meri Zindagi Se Pochiye Zindagi Kia Hai
Zindagi Hai Aik Khuwaab Is Ke Siwa Kuch Nahi
Khushiyan Hain Lakhon Is Dunya Main Magar
Udasi Hai Mere Dil Main Is Ke Siwa Kuch Nahi
Mujh Se Jo Log Bhi Mile Hain Khush Hokar
In k Dilon Main Hai Nafrat Ke Siwa Kuch Nahi
Waday Karte Hai Log Magar Jante Nahi Wafa Karna
Bewafai Hey Is Dunya Main Is Ke Siwa Kuch Nahi
Pal Main Jisse Chaha Usse Pal Main Bhula Diya
Yeh Khel Hey Dunya Ka Is Ke Siwa Kuch Nahi
Tum Ko Chaha Hey Magar Kuch Bhi Nahi Socha Ke
Dunya To Hai Eik Sayraab Is Ke Siwa Kuch Nahi
Naaz-e-be-Gaangii
naaz-e-be-gaangii meN kyaa kuch thaa
husn kii saadgii meN kyaa kuch thaa
laakh raaheN thiiN, laakh jalve the
ahd-e-aavaargii meN kyaa kuch thaa
aaNkh khulte hii chhup gayii har shai
aalam-e-beKhudii meN kyaa kuch thaa
yaad haiN marhale muhabbat ke
haaye ! us be-kalii meN kyaa kuch thaa
kitne biite dinoN kii yaad aayii
aaj terii kamii meN kyaa kuch thaa
kitne maanuus log yaad aaye
subh kii chaaNdnii meN kyaa kuch thaa
raat bhar ham na so sake “Nasir”
parda-e-Khaamshii meN kyaa kuch thaa
Na galiiyaaN haiN
na galiiyaaN haiN, na ghar, kuch bhii nahiiN hai
sitaaroN se udhar kuch bhii nahiiN hai
thakan kahtii hai aa ghar laut jaayeN
musaafir ye safar kuch bhii nahiiN hai
parinde to azal ke be-vafaa haiN
KhizaaN meN shaaKh par kuch bhii nahiiN hai
meraa bhaa’ii se rishtaa KhuuN kaa hai
ta’aluq hai magar kuch bhii nahiiN hai
ye almaarii to hai vaisii kii vaisii
kitaaboN kaa asar kuch bhii nahiiN hai
abhii duniyaa hai merii naa-mukammal
falak yaa baal-o-par kuch bhii nahiiN hai
Mujhse kaafir ko tere ishq ne
mujhse kaafir ko tere ishq ne yuuN sharmaayaa
dil tujhe de ke dhaRkaa to Khudaa yaad aaya
chaaraagar aaj sitaaroN kii qasam Khaa ke bataa
kisne insaaN ko tabassum ke liye tarsaayaa
nazr kartaa rahaa maiN phuul ke jazbaat use
jisne patthar ke khilonoN se mujhko bahlaayaa
usne andar ko’ii fankaar chhupaa baiThaa hai
jaante-buujhte jis shaKs ne dhokaa Khaayaa
Mujhe bujhaa de
mujhe bujhaa de, meraa dard muKhtasar kar de
magar diye kii tarah mujh ko mo’atbar kar de
merii talaash ko be-naam-o-be-safar kar de
maiN teraa raastaa chhoRuuN to dar-ba-dar kar de
judaaiiyoN kii ye raateN to kaaTnii hoNgii
kahaaniyoN ko ko’ii kaise muKhtasar kar de
tere Khayaal ke haathoN kuch aisaa bikhraa huuN
ke jaise bachaa kitaabeN idhar-udhar kar de
Zindagii meN to sabhii
zindagii meN to sabhii pyaar kiyaa karte haiN
maiN tau mar kar bhii merii jaan tujhe chaahuuNgaa
tuu milaa hai to ye ehsaas hu’aa hai mujhko
ye merii umr muhabbat ke liye thoRii hai
ek zaraa saa Gham-e-dauraaN kaa bhii haq hai jis par
maiN ne vo saaNs bhii tere liye rakh chhoRii hai
tujh pe ho jaauuNgaa qurbaan tujhe chaahuuNgaa
apne jazbaat meN naGhmaat rachaane ke liye
maiN ne dhaRkan kii tarah dil meN basaayaa hai tujhe
maiN tasavvur bhii judaa’ii kaa bhalaa kaise karuuN
maiN ne qismat kii lakiiroN se churaayaa hai tujhe
pyaar kaa ban ke nigehbaan tujhe chaahuuNgaa
terii har chaap se jalte haiN KhayaaloN meN chiraaG
jab bhii tuu aaye jagaataa hu’aa jaaduu aaye
tujhko chhuu luuN to phir ai jaan-e-tamannaa mujhko
der tak apne badan se terii Khushbuu aaye
tuu bahaaroN kaa hai unvaan tujhe chaahuuNgaa
YuuN zindagii kii raah
yuuN zindagii kii raah mein takraa gayaa ko’ii
ek roshnii andheroN meN bikhraa gayaa ko’ii
vo haadisaa vo pahlii mulaaqat kyaa kahuuN
kitnii ajab thii suurat-e-haal kyaa kahuuN
vo qah’r, vo Ghazab, vo jafaa mujh ko yaad hai
vo uskii be-ruKhii ki adaa mujh ko yaad hai
miTtaa nahiiN hai zeh’n pe yuuN chhaa gayaa ko’ii
pehle mujhe vo dekh ke barham si ho gayii
phir apne hi hasiiN khayaaloN meN kho gayii
bechaargii pe meri use rah’m aa gayaa
shaayed mere taRapne kaa andaaz bhaa gayaa
saansoN se bhii qariib mere, aa gayaa ko’ii
ab us dil-e-tabaah ki haalat na puuchhiye
be-naam aarzuu ki wo lazzat na puuchhiye
ek ajnabii thaa, ruuh kaa armaan ban gayaa
ek haadisaa thaa, pyaar kaa unvaan ban gayaa
manzil kaa raastaa mujhe dikhlaa gayaa ko’ii
